1Pe 5 | KYG | STEP | Nagaemo lapakae'e'mo magokepi lokae'a mai'ne'a yagai'a nelapataya vayatama vaya'aife'mo gemo hapa paigesuve. Nagae'e'mo yagai'na ne'apatova vayatama vekamo mai'nove. Naulagafati'mo Kalaisi'a age'nogeno kanamo ali'nige'na agete'nae'mo ae'na hakalo hu'na hapa nepauva vekamo mai'novanage'na Kalaisi'a ha le konali ya'amo afole aisige'nae'mo hetama'nimo aliguve. Lapao ke hovanagi,

1 Peter 5

Goti mafa'ne'aite'mo yagai'a ne'apateya vayatama vaya'aife'mo hu'niya gemae

1 Nagaemo lapakae'e'mo magokepi lokae'a mai'ne'a yagai'a nelapataya vayatama vaya'aife'mo gemo hapa paigesuve. Nagae'e'mo yagai'na ne'apatova vayatama vekamo mai'nove. Naulagafati'mo Kalaisi'a age'nogeno kanamo ali'nige'na agete'nae'mo ae'na hakalo hu'na hapa nepauva vekamo mai'novanage'na Kalaisi'a ha le konali ya'amo afole aisige'nae'mo hetama'nimo aliguve. Lapao ke hovanagi, 2 Goti'a sipisipi anaga vaya'amo apavaleno lapayapi'mo lapami'niya aya'ale'mo alagepa huta yagaitapa apateyo. Lapakaemo ani ali'ya'mo alisayafe'mo olapau'nisigetapa alisayana kanale osugiye. Lapau'nisigetapaeke'mo ani ali'ya'mo aliyo. Hosu monimo alisayafe'mo ani ali'ya'mo o'alitapa lapaipamo'mo hatu nehinagetapa ali'ya'mo aliyo. 3 Goti'a apavaleno lapayapi'mo lapami'niya sipisipile'mo yagaitapa ne'apatetapae'mo alita afepi o'apatetapa lapakame hisayafe'mo apakaetegamo alagepa kava'age'mo hiyo. 4 Hogote vekamo sipisipile'mo yagaino ne'apateya kava vekamo emineno afole aisigetapae'mo ha le konali yatapimo alagi hano osisiya hetamatapimo aligae.

Apaiyafi'mo maiyo, huno hu'niya gemae

5 Neya vaya'mogitapae, hu'na, vayatama vaya'ai apaiyafi'mo mai'netapa ge'apimo afiyo. He, muki vaya'amogitapamo, ina agufa vaya'mo mai'none, nehutapa ali'ya'mo ne'aliya vaya'mogimo ali'a ne'vaiya kukenamo ali'a ne'vaiya kava hutapa konagatapimogi apaiyafi'mo mai'netapa ge'apimo afiyo. Na kava nehiya'mofe'mae.

Goti'a ala vaya'mo mai'none, hu'a apakesamo ne'afiya vaya'aife'mo kame huno ne'apateya'monanafa ina agufa vaya'mo mai'none, hu'a apakesamo ne'afiya vaya'aina fiku hapa maeno ne'apamiye.
6 Ani kava'mo nehiya'mofe'mo lapakufamo alino afepi lapatesigetapae'mo Goti'a ayamufa vekamo aiya afe'alumelaga mai'nigeno'ao hau'nisiya afina'mo alino asaga huno lapateno. 7 Agaemo lapakaefe'mo hau'nigeno alagepa huno yagaino nelapateya'mofe'mo lapakesa ala'amo ne'afitapa lapausoli hisaya kavatapimo alita Goti'mo amiyo. 8 Kametapimo Satani'a kaekae nehiya laiyonigana huno mai'neno'ae'mo vaya'mo hapaesiyafe'mo umenitata nehiyanagi lapau mai'mai osutapa alagepa huta kava yagaitapa maiyo. 9 Gotifeke'mo mago'e hutapa lapakesa afita fatago nehutapae'mo kame hutapa ateyo. Ago afi'nayana lapakaemo kanamo ne'aliya kava hu'a muki ma mopafi ne'maiya konagatapimogimo kanamo ne'aliyanagi he tita lokiya vaitapa maiyo. 10 Fiku lapa maeno nelapamiya Goti'a Yesu Kalaisiteti'mo ha le konali ya'amo alagi hanege hanege huno hanesiya ha le konali ya'amo alisunafe'mo lagaefe'mo keya aeno ge hu'niye. Inagi aise afina'mo kanamo alisageno'ae'mo agaemo alagi alino alagepa huno lapatege alino lokiya vaino lapatege lokiya'amo alino lapamige hisigetapae'mo he tita lokiya vaitapa maigae. 11 Ala agi'amo hanege yagaino ne'apateya lokiya'amo hanege huno muki afina'mo alagi hanege hanege huno haneno maino. He, lama ge.

12 Nagesamo afuvana Silivenisi'a kanale konagatimo'mo naha mae'nige'na mani aise avo'mo nekaove. Ali'na lokiya vai'na lapatesuva agufa gemo hu'na lapa pai'nae'mo, ago afi'novana Goti'a fiku hapa maeno ne'apamiya kavafe'mo ava gemo hu'nae'mo, lama gemo hane'niye, hu'na mani avo'mo kae'na lapa nepauve. Ani kavatefeke'mo lapakesa afita fatago huta atafauta alagi hutapa maiyo. 13 Goti'a ago lekana paino lapate'niya kava huno Mamiloni kotega siosi vaya'mo lekana paino apate'niye. Apakaemo ge lapamamae'nae. Mafa'ne'nimo Maki'e'mo ge lapamamae'niye. 14 Konagatapie'mo lapau lapayamopafi'mo lapau'ninagetapa ge ne'apamamaetapa hapaeta neyo. Kalaisi Yesupi'mo mai'naya vaya'mogitapae, lapaipamo'mo falu hino.